តួកគី៖ សហព័ន្ធបាល់ទាត់តួកគី នៅថ្ងៃទី១៩ ខែកញ្ញាម្សិលមិញនេះបានប្រកាសតែងតាំងអតីតគ្រូបង្គោលក្រុមយុវជនអាយុក្រោម ២១ឆ្នាំជម្រើសជាតិអាល្លឺម៉ង់ លោក Stefan Kuntz ជាអ្នកចាត់ការទូទៅថ្មី ក្រោយពីប្រកាសចែកផ្លូវគ្នាក្រោមហេតុផលមួយចំនួនជាមួយអ្នកចាត់ការ Senol Gunes កាលពីពេលថ្មីៗនេះ។

ការប្រកាសចាកចេញពីក្រុមជម្រើសជាតិតួកគីរបស់លោក Senol Gunes បានធ្វើឡើងក្រោយបរាជ័យយ៉ាងធ្ងន់ធ្ងរ ៦-១ ទល់នឹងក្រុមជម្រើសជាតិហូឡង់ នាវគ្គជម្រុះ FIFA World Cup ពូល G។ តួកគី មាន ១១ពិន្ទុ បានរំកិលធ្លាក់ដល់ចំណាត់លេខ ៣ ក្នុងតារាង ឈរក្រោមក្រុមហូឡង់ និងណ័រវេយ៍ដែលមាន ១៣ពិន្ទុស្មើគ្នា។ 

ដោយឡែក ងាកទៅកាន់សហព័ន្ធបាល់ទាត់អាល្លឺម៉ង់វិញក៏បានបញ្ជាក់ដែរថា សហព័ន្ធនឹងធ្វើការអនុញ្ញាតបញ្ចប់កុងត្រាដែលនៅសេសសល់ជាមួយលោក Stefan Kuntz ប្រសិនបើលោកយល់ព្រមទទួលការងារជាមួយសហព័ន្ធបាល់ទាត់តួកគីជាផ្លូវការ។ គួររំលឹកថា អ្នកចាត់ការថ្មីលោក Stefan Kuntz ក៏ធ្លាប់លេងនៅលីគកំពូលតួកគីជាមួយក្រុម Besiktas នៅឆ្នាំ១៩៩៥/១៩៩៦ ផងដែរ។

ដោយឡែក ក្នុងការងារជាគ្រូបង្វឹកវិញ បុរសវ័យ៥៨ឆ្នាំខាងលើនេះធ្លាប់ដឹកនាំក្លិបលំដាប់មធ្យម និតំបន់មួយចំនួននៅអាល្លឺម៉ង់ដូចជា Karlsruher SC នៅលីគទី២ អាល្លឺម៉ង់, ក្លិប Waldhof Mannheim ជាដើម មុននឹងកាន់តំណែងជាគ្រូបង្គោលក្រុមអាយុក្រោម ២១ឆ្នាំអាល្លឺម៉ង់ នឹងដឹកនាំឈុតនេះគ្រងជើងឯកយុវជនអាយុក្រោម ២១ឆ្នាំទ្វីបអឺរ៉ុប ២លើកនៅឆ្នាំ២០១៧ និង ២០២១ និងជើងឯករងម្តងនៅឆ្នាំ២០១៩

លោក Kuntz នឹងត្រូវដឹកនាំក្រុមជម្រើសជាតិតួកគីជាផ្លូវការ ដោយជួបជាមួយក្រុមជម្រើសជាតិណ័រវេយ៍ និងក្រុមជម្រើសជាតិឡេតូនី នៅថ្ងៃទី០៩ និងថ្ងៃទី១២ ខែតុលាខាងមុខនេះ៕